सर्व प्रथम हजार किल्ल्यांची मनसबदारी मिळविलेल्या ॲड. मारुती (आबा) गोळे यांना मानाचा मुजरा…
त्यांनी २०१२ मध्ये सिंहगड पाहिला. तिथून गडकोटांची ओढ निर्माण झाली आणि आठ वर्षांत एक हजार गडकोटांची पायधूळ मस्तकी घेऊन सहस्रदुर्गवीर होण्याचा मान पटकावला.
देशभरातली विविध राज्ये आणि १४ देशांतील मिळून एक हजार गडकोट पाहणारे नाव आहे, पुण्यातील पिरंगुट येथील दुर्गअभ्यासक ॲड. मारुती गोळे. राजस्थानातील मेहरानगड (जि. जोधपूर) हा त्यांचा एक हजारावा गड ठरला.
विशेष म्हणजे, दुर्गभ्रमंतीनंतर गोळे यांनी जमविलेली या गडकोटांची माहिती आणि छायाचित्रे सोशल मीडियाच्या माध्यमातून नव्या पिढीसाठी उपलब्ध केली आहेत. ही माहिती सर्वांना मोफत उपलब्ध करून, नव्या पिढीला गडकोटांकडे वळविण्याचा आणि गडसंवर्धनाचा विचार रुजविण्याचा हेतू असल्याचे गोळे यांनी सांगितले.
गोळे यांनी एक हजार गडांची भ्रमंती पूर्ण केली. यासाठी मेहरानगडावरील कर्मचाऱ्यांनीही त्यांचे विशेष स्वागत केले. गडाच्या नगारखान्याजवळ छत्रपती शिवाजी महाराजांचे गीत गाऊन त्यांचे स्वागत आणि सन्मान झाला. तेथील राजा मानसिंग यांनी या मोहिमेची दखल घेऊन त्यांचे अभिनंदनही केले.
महाराष्ट्रासह गोवा, हरियाणा, पंजाब, हिमाचल प्रदेश, कर्नाटक, राजस्थान, मध्य प्रदेश आणि १४ देशांतील गड पाहिले. आगामी काळात भारतातील उर्वरित राज्यांतील गडकोट पाहायचे आहेत. गडकोट ही आपली प्रेरणास्थळे आहेत.
आपल्या पुढच्या पिढ्यांनी त्यांचा इतिहास समजून घ्यावा, अशी इच्छा आहे. आजवर कुटुंबीयांचा पाठिंबा, वडील बबनराव आणि थोरल्या बंधूंचे मार्गदर्शन, पत्नी स्वाती गोळे व मुलांनी केलेले सहकार्य; तसेच मित्रमंडळींची साथ यामुळे हा टप्पा गाठता आला, अशी भावनाही गोळे यांनी व्यक्त केली.
आपल्या देशात वैविध्यपूर्ण गडकोट आहेत. सह्याद्रीतील गडांनी देशभरातील दुर्ग अभ्यासण्याची प्रेरणा दिली. शिवछत्रपतींच्या आशीर्वादाने एक हजार गड पाहण्याची मोहीम यशस्वी करू शकलो. हा ठेवा नव्या पिढीसमोर मांडायचा आहे.